हार्दिक श्रद्दान्जली !

 

 

 

 

 

 

 

ताप्लेजुङको फुङलिङ नगरपालिका- १० स्थित दारेढुंगाको जंगलमा आज हेलिकोप्टर दुर्घटनामा परी पर्यटन तथा नागरिक उड्ययन मन्त्री रवीन्द्र अधिकारी सहित सात जनाको ज्यान गएको खबरले हामी स्तब्ध भएका छौं।

हेलिकप्टरमा सवार मन्त्री अधिकारी, प्रधानमन्त्री कार्यालयका सल्लाहकार युवराज दाहाल, नेपाल नागरिक उड्ययन प्राधिकरणका उपमहानिर्देशक वीरेन्द्र श्रेष्ठ, यति एयरलाइन्सका अध्यक्ष आङछिरिङ शेर्पा, नेपाल नागरिक उड्न प्राधिकरणका इन्जिनियर धुब्रदास भोछिभया, हेलिकोप्टर क्याप्टेन प्रभाकर के.सी. तथा मन्त्री अधिकारीका पिएसो अर्जुनकुमार घिमिरेको आत्मालाई चीर शान्ति र परिवारलाई धैर्य धारण गर्ने शक्ति मिलोस्।

यस दुखद घडीमा विवेकशील साझा पार्टी भावपूर्ण श्रद्दान्जली ब्यक्त गर्दछ।

यस्ता घटना दोहोरिन नदिन दुर्घटनाको कारण यथासक्य छिटो पत्ता लगाउने तर्फ गम्भीर पहलका लागि पनि हामी सरकारलाई आग्रह गर्दछौँ।

डा. सूर्यराज आचार्य
प्रवक्ता
विवेकशील साझा पार्टी
मिति: १५ फागुन २०७५

देशभरी ‘ठूला माछा समाऊ’ प्रदर्शन


विवेकशील साझा पार्टीले भर्खरै शुरू गरेको भ्रष्टाचार विरोधी अभियान अन्तर्गत आज देशका विभिन्न ठाउँमा पार्टीका नेता तथा शुभेच्छुकहरूले प्रदर्शन गरेका छन्।

काठमाडौं, भक्तपुर, काभ्रे, चितवन, इटहरी, पोखरा, बुटवल, नवलपुर, सुर्खेत, दार्चुला, टिकापुर, धनगढीलगायत कयौं ठाउँहरूमा प्रदर्शनकारीहरूले शान्तिपुर्वक “ठूलो माछा समाऊ, भ्रष्टाचारी जेल परून्, बेरोजगार छन् दम्पत्ति, कहाँबाट आयो सम्पत्ति, चर्को स्वरमा बौलौं, भ्रष्टाचारीको पोल खोलौँ” जस्ता नारा लेखिएका प्लाकार्ड बोकेका थिए।

उनीहरूले ठाउँठाउँमा भ्रष्टाचार विरुद्ध युद्धको उद्घोष गर्न शंखनाद पनि गरेका थिए।

अख्तियार दुरुपयोग अनुषन्धान आयोग भएका ठाउँहरूमा प्रदर्शनकारीहरूले भ्रष्टाचार विरूद्ध ज्ञापनपत्र बुझाएका थिए।

ज्ञापनपत्रमा “देश भ्रष्टाचारले बर्बाद भएको र अख्तियारजस्तो शक्तिशाली निकायले कुनै राजनीतिक दबाबमा नपरी ठूला भ्रष्टाचारीलाई कारवाही गर्न डराउन नहुने” उल्लेख गरिएको थियो। प्रदर्शनकारीहरूले भष्टाचार विरूद्धको लडाँइमा अख्तियारलाई आफूहरूले सधैं साथ दिने बताएका थिए।

भ्रष्टाचार विरूद्धको अभियानलाई विवेकशील साझा पार्टीले निरन्तरता दिनेछ।

आज देशका विभिन्न भागमा भएका प्रदर्शनका झलकहरू यसै विज्ञप्तिसाथ पठाइएको छ।

प्रवक्ता
डा सूर्यराज आचार्य
विवेकशील साझा पार्टी
मिति: १४ फागुन २०७५

बिभिन्न ठाउँमा भएका बिस्फोटका घटनाको भत्सर्ना

द्वन्द्वोत्तर मुलुकको कष्टकर घाउमा राम्रोसँग खाटा बस्न पनि पाएको छैन। यहि परिवेशमा भर्खरै देशका विभिन्न भागमा हिंसात्मक विस्फोटका घटनाहरुले हामीलाई पुनः त्यही नमिठो स्मरणले झस्काएको छ। भीषण द्वन्द्वबाट गुज्रिएको मुलुकमा फेरि यस्ता हिंसात्मक घटनाहरु घटित हुन थाल्नु मुलुकको संविधान, विधिको शासन तथा सम्पूर्ण लोकतान्त्रिक प्रक्रिया माथिकै चुनौती, चिन्ता र आपत्तिको विषय हो।

अतः आफ्ना असंतुष्टि, मान्यता र गतिविधिहरुलाई लोकतान्त्रिक विधि र प्रक्रिया द्धारा अभिव्यक्त गर्न पाइने संवैधानिक व्यवस्था हुँदा हुँदै हिंसा, हत्या र विध्वंसद्धारा समाजलाई आतंकित पार्ने जोसुकैले गरेका गतिविधि भए पनि विवेकशील साझा पार्टीले घोर निन्दा र भ्रत्सना गर्दै सामाजिक ध्वंसमा विश्वास राख्ने दल या समूहलाई चाँडो भन्दा चाँडो हिंसालाई त्यागेर लोकतान्त्रिक विधि र प्रक्रियामा विश्वास गर्न आह्वान गर्दछ।

हत्या हिंसा र आतंकबाट सामाजिक परिवर्तनको दिगो र प्राकृतिक बाटो कहिल्यै पहिल्याउन सकिदैन भन्ने कुरामा हाम्रो पार्टी दृढ विश्वास गर्दछ।

भर्खरको घटनामा मृत्यु भएका मृतकको आत्माको चीर शान्तिको कामना गर्दै घाईते भएका नागरिकहरुको शिघ्र स्वास्थ्योपचार गर्न र क्षति भएका नागरिकहरुका हकमा क्षतिपुर्तिको व्यवस्था गर्न समेत सरकारसँग माग गर्दछ। यस प्रकारको कायरतापूर्ण हिंसाबाट पिडित घाईतेहरुको शिघ्र स्वास्थ्य लाभको समेत कामना गर्दै दोषी पत्ता लगाएर यथाशिघ्र उनीहरु माथि कानूनी कारवाहीको समेत माग गर्दछ।

डा. सूर्यराज आचार्य
प्रवक्ता
विवेकशील साझा पार्टी
मिति: ११ फागुन २०७५

विवेकशील साझाको प्रदेश १ संयोजक घोषणा

विवेकशील साझा पार्टीले झापाका समाजसेवी तथा उद्यमी अनिल भेटवाललाई पार्टीको परम्परा अनुसार माटोको टिका लगाएर प्रदेश नं १ को संयोजक घोषणा गरेको छ।

आज बिराटनगरमा सयौं सर्वसाधारण, सो क्षेत्रका प्रतिष्ठित व्यक्तित्वहरू, पार्टीका संयोजक रवीन्द्र मिश्र, प्रवक्ता सूर्यराज आचार्य तथा अन्य नेताहरुको उपस्थितिमा उहाँको नाम सार्वजनिक गरिएको हो।

सन् १९९० ताका राजनीति गरेर पछि राजनीति त्यागेका भेटवाल सन् १९९५ मा सबैभन्दा कम उमेर (२९ वर्ष) मा नेपाल जेसिसको राष्ट्रिय अध्यक्ष बन्नुभएको थियो।

हाल पनि उहाँ जेसिसको देशव्यापी प्रशिक्षक भएका कारण प्रदेश १ का सबै जिल्लाहरूमा उहाँको परिचयको राम्रो सञ्जाल छ। झण्डै ६ वर्ष सपरिवार अमेरिका बसेर सन् २००८ मा सधैंको लागि नेपाल फिर्ता आउनु भएका भेटवाल झापाका एकजना उद्यमी पनि हुनुहुन्छ।

कार्यक्रममा आफ्नो मन्तव्य राख्दै नवनियुक्त प्रदेश संयोजक भेटवालले आफ्नै जीवनकालमा देशको रूपान्तरणको लक्ष्य बोकेर अघि बढ्न लागेको विवेकशील साझा पार्टीको नेतृत्वमा संलग्न भएर पार्टी तथा राष्ट्र निर्माणमा होमिन पाएकोमा अत्यन्तै खुशी र उत्साहित भएको बताउनु भयो।

पार्टीका संयोजक रवीन्द्र मिश्रले अनिल भेटवाल जस्तो व्यक्तित्वलाई प्रदेश नं १ को नेतृत्व सुम्पन पाउनु खुशीको विषय भएको बताउनुभयो।

विवेकशील साझा पार्टीले यस अघि नै प्रदेश ३, गण्डकी प्रदेश, प्रदेश ५, कर्णाली प्रदेश र सुदूरपश्चिम प्रदेशको संयोजकमा क्रमश: समीक्षा बास्कोटा, महेश भण्डारी, अनुपमान सैँजु, गेहेन्द्र प्रसाद दहाल र गोपाल हमाललाई चयन गरिसकेको छ।

डा.सूर्यराज आचार्य
प्रवक्ता
विवेकशील साझा पार्टी
१० फाल्गुन २०७५

अष्ट्रेलियामा बिचल्ली नेपाली विद्यार्थी बारे


ठूलो रकम असुल गरी अध्ययनका लागि भनेर अनुमति नै नपाएको कलेजमा पठाईएका १२०० नेपाली विद्यार्थीको अष्ट्रेलियामा बिचल्ली भएको खबर प्रति विवेकशील साझा पार्टी गंभीर चिन्ता व्यक्त गर्दछ।

बिचल्ली विद्यार्थीहरुलाई तत्काल उद्धार गर्नका साथै अष्ट्रेलियन सरकारसंगको समन्वयमा उनीहरुको अध्ययनको प्रवन्ध मिलाउन विवेकशील साझा पार्टी नेपाल सरकारलाई आग्रह गर्दछ। साथै अष्ट्रेलिया स्थित गैर आवासीय नेपाली संगठन लगायतका नेपाली सामाजिक संघ-संस्थाहरुलाई समेत समस्यामा परेका नेपाली विद्यार्थीलाई आवश्यक सहयोग पुर्याईदिनु हुन अनुरोध गर्दछौं।

विद्यार्थीहरु यसरी विचल्ली पर्नुको मूल कारण सरकारी निकायको फितलो अनुगमन र लापरवाही हो भन्ने कुरा स्पष्ट छ। एकिन छानविन गरि यस्तो लापरवाहीपूर्ण कार्यका जिम्मेवारहरुलाई कारवाहीको समेत विवेकशील साझा पार्टी माग गर्दछ।

नेपाली विद्यार्थीहरु विश्वविद्यालयको प्रारम्भिक तहको अध्ययनको लागि घर खेत नै बेचेर महँगा तर औषत गुणस्तरका विदेशी कलेजमा जानु पर्ने वाध्यता अत्यन्तै दुर्भाग्यपूर्ण कुरा हो।अध्ययन गर्नका लागि विदेश जाने नेपाली विद्यार्थीहरु बिचल्ली हुने निरन्तरको समस्या बनेको छ। युवा विद्यार्थीले रोजगारीको सुनिश्चित हुने गुणस्तरीय विश्वविद्यालय स्तरीय शिक्षा नेपालमै पाउन सक्ने अवस्था सृजना गर्न समेत नेपाल सरकारलाई गंभीरताका साथ आवश्यक नीतिगत पहल गर्न आग्रह गर्दछौं।

डा. सूर्यराज आचार्य
प्रवक्ता, विवेकशील साझा पार्टी
मिति: ०९ फागुन, २०७५

विवेकशील साझाको भ्रष्टाचार विरोधी प्रदर्शनमा धरपकडबारे

आज अख्तियार दुरूपयोग अनुषन्धान आयोगबाहिर अख्तियारलाई सघाउने र भष्टाचारको विरोध गर्ने उद्देश्यले विवेकशील साझा पार्टीले आयोजना गरेको विरोध प्रदर्शनमा भएको प्रहरी धरपकड तथा गिरफ्तारीको पार्टी घोर भत्सर्ना गर्दछ।

“अख्तियार: सानो माछामात्र होइन, ठूलो पनि समाउ” भन्दै सांकेतिकरूपमा ठूलो माछा बनाएर प्रदर्शन गर्नेहरूमध्ये पार्टीका ३० जनाभन्दा बढी प्रदर्शनकारीहरू गिरफ्तार गरिएका छन्। सो प्रतिकात्मक माछामा “वाइडबडी काण्ड, सुन काण्ड, एनसेल काण्ड, फोरजी काण्ड, स्वीस काण्ड” आदि लेखिएको थियो।

“हामी ट्र्याफिक अवरोध गर्दैनौं, लाइनबाट जान्छौं” भन्दाभन्दै प्रदर्शनकारीहरूलाई गिरफ्तार गरिएको थियो। गिरफ्तार हुनेमा पार्टीकी प्रदेश ३ संयोजक समिक्षा बास्कोटा, केन्द्रीय सदस्य मानवी पौडेल, काठमाडौं जिल्ला संयोजक अनुपा श्रेष्ठ र ललितपुरका जिल्ला संयोजक उज्वलकृष्ण श्रेष्ठ पनि छन्।

उनीहरूलाई तुरून्तै रिहा गर्न विवेकशील साझा पार्टी माग गर्दछ।

शान्तिपुर्ण ढङ्गबाट गरिएको प्रदर्शन समेत दबाउन खोज्नुले यो सरकार तानाशाही बन्दै गइरहेको छ भनि आम रूपमा गरिन थालेको टिप्पणीलाई पुष्टी गरेको छ। साथै, विवेकशील साझाले सरकारको यस्तो रवैयालाई शान्ति भन्दा हिंसा र सदाचारभन्दा भ्रष्टाचार बुझ्ने नेतृत्वको रूपमा लिएको छ।

विवेकशील साझा पार्टीको भ्रष्टाचार विरोधी अभियानको यो शुरूवात मात्र हो। आउँदो मंगलबार, फागुन १४ गते विहान ११ बजे विवेकशील साझा पार्टीले अख्तियारको अगाडि पुन शान्तपुर्ण प्रदर्शन गर्दै अख्तियारका प्रमुख आयुक्तलाई ज्ञापनपत्र बुझाउने र सोही समयमा देशका अन्य भागमा पनि मूल नारा “सानो माछामात्र होइन, ठूलो पनि समाउ” सहित भ्रष्टाचार विरोधी प्रदर्शनहरू गर्नेछ।

देशलाई भ्रष्टाचारले ध्वस्त पारेको अवस्थामा भ्रष्टाचार विरोधी अभियानमा साथ दिन विवेकशील साझा पार्टी सबै नागरिकहरूलाई आग्रह गर्दछ।

डा सूर्यराज आचार्य
प्रवक्ता
विवेकशील साझा पार्टी
मिति: ०८ फागुन २०७५

पशुपति शर्माको गीतबारे विवेकशील साझा युवा संगठनको विज्ञप्ति

लोकप्रिय गायक पशुपति शर्माको ‘लुट्न सके लुट कान्छा’ बोलको गीत प्रकाशन प्रशारणबाट हटाउन बाध्य पारिएको बिषयमा विवेकशील साझा युवा संगठनको गम्भिर ध्यानाकर्षण भएको छ।

नेपालको संबिधानको धारा १७ को उपधारा २ (क) को बिचार र अभिब्यक्तिको हक, धारा १९ को उपधारा १ को संचारको हकको प्रतिकुल तथा राष्ट्रिय कलाकारको अपमान भएको विवेकशील साझा युवा संगठनको निश्कर्ष छ।

युवा जोस र सिर्जनात्मकतालाई सही ढंगले सदुपयोग गर्नु पर्नेमा देशमा व्याप्त भ्रष्टाचार, अनियमितता र बेथितिमाथि कटाक्ष गरिएको गीत गाउने गायकलाई आक्रोसपूर्ण शैलीमा धाक-धम्की मिश्रित शब्दहरुको प्रयोग गरी सत्तारूढ कम्युनिस्ट पार्टी निकट देखिने युवा संघ नेपालले आफ्नो फेसबुक पेजमा सन्देश प्रेषित गर्नु अत्यन्तै निन्दनिय छ।

विकृति र विसंगतिका विरुद्ध आम युवालाई नै उद्वेलित गर्नु पर्नेमा देश र नेतृत्व सही बाटोमा हिँडोस् भन्ने भावले आएका आलोचनात्मक अभिव्यक्तिहरुप्रति युवा संघको प्रतिशोधपूर्ण अभिव्यक्ति आउनु युवाहरूलाई देशका प्रमूख पार्टीले कसरी एकोहोर्याएर गलत रूपमा प्रयोग गरिरहेछन् भन्ने कुराको प्रमाण हो।

पछिल्लो समयमा देशमा सुशासन कायम गर्ने राज्यका जिम्मेवार निकायका अधिकारीहरु नै भ्रष्टाचार र कुकृत्यमा लागेका समाचारहरु सार्वजनिक हुनु, सत्तापक्ष र प्रतिपक्षबाट स्पष्ट राजनीतिक प्रतिबद्धता नआउनु र एकपछि अर्को अनियमितताका खबरहरु आउँदा पनि सरकारले त्यसका विरुद्ध स्पष्ट हस्तक्षेपकारी भूमिका नखेल्नु बिडम्बनापूर्ण छ।

विवेकशील साझा युवा संगठन कलाकारहरु राष्ट्रका गहना हुन् र लेख, रचना, श्रब्य, दृश्य सामग्रीले पनि समाज रुपान्तरण हुन सक्छ भन्नेमा बिश्वास गर्दछ। विवेकशील साझा युवा संगठन सम्पुर्ण कलाकारहरुको अभिव्यक्ति स्वतन्त्रताको पक्षमा सदैब उभिने छ।

अब्दुस मिँया
संयोजक
विवेकशील साझा युवा संगठन

सरकारको एक वर्षबारे

सरकारको एक वर्षबारे

अस्थिर सरकारको चपेटाबाट मुलुक गुज्रिएको विगतको परिप्रेक्षमा वर्तमान सरकारले एक वर्षको कार्यकाल पुरा गरेकोमा विवेकशील साझा पार्टी प्रधानमन्त्री केपी ओलीलाई हार्दिक बधाई दिन चाहन्छ।

बलियो जनमत प्राप्त यो सरकार गठन हुँदा आम सर्वसाधारण र हाम्रो पार्टीले ठूलो अपेक्षा राख्दै शुभकामना दिएको थियो। सरकारले पछि संसदमा दुई-तिहाईको समर्थन समेत प्राप्त गर्यो। तर ऐतिहासिक शक्ति बोकेको सरकार हुँदा हुँदै पनि सरकारको काम-कारवाही पीडादायी ढंगबाट निराशाजनक देखिएकोमा विवेकशील साझा पार्टी अत्यन्तै चिन्तित छ।

भ्रष्टाचार चुलिंदो छ। दण्डहीनताले प्रश्रय पाईरहेको छ। अर्थतन्त्रका प्रमुख सूचकहरुको संकेत नकारात्मक छन्। निजी क्षेत्र र लगानीकर्तामा उत्साह छैन। विकास र पूर्वाधार निर्माणमा अलमल र चरम नैराश्य छ।

समाजवाद-उन्मुख भनिएको हाम्रो राज्य विपन्न र गरिव जनताको झुपडीमा पुग्ने कुनै संकेत देखिएको छैन। समग्रमा भन्नु पर्दा विकास र संवृद्धिलाई मूल नारा बनाएको सरकारले सो हासिल गर्न लागि रणनैतिक प्रस्थान बिन्दु नै पहिल्याउन सकेको छैन।

लोकतान्त्रिक अधिकार र नागरिक स्वतन्त्रता खुम्च्याउने गरी कानून निर्माण हुँदै गरेको देखिंदै छ। वैदेशिक सम्बन्धलाई राष्ट्रहितमा डोर्याउन आवश्यक कुटनैतिक चातुर्यतामा सरकार पटक-पटक चुकेको छ। हाम्रो मौलिक संस्कृति र राष्ट्रिय स्वाभिमानप्रति समेत सरकारको असंवेदनशीलता बेलाबखतमा प्रकट हुनु खेदजनक छ।

विगत एक वर्षको गंभिर समीक्षा गरी अगाडिको बाटो तय गर्नका लागि विवेकशील साझा पार्टी सरकारलाई आग्रह गर्दछ।

यो घडिमा सरकारका आलोचकहरूप्रति प्रधानमन्त्री स्वयंले अशाेभनीय भाषा प्रयोग गर्दै असहिष्णु हुनु भन्दा आलोचनालाई सकारात्मकरूपमा ग्रहण गरी आम जनताको मन जित्ने कार्यशैली अपनाउन हामी सरकारलाई सुझाव दिन चाहन्छौं।

सरकारको बाँकी कार्यकालको सफलताकालागि हामी हार्दिक शुभकामना व्यक्त गर्दछाैं।

डा. सूर्यराज आचार्य
प्रवक्ता, विवेकशील साझा पार्टी
मिति: ०३ फागुन, २०७५

विवेकशील साझा सञ्चार विभागको सम्पादकमा शरदराज पाठक

विवेकशील साझा सञ्चार विभागको सम्पादकमा शरदराज पाठक

विवेकशील साझा पार्टीले यसै हप्ता शुरू गरेको ‘विवेकशील साझा सूचनापाट’, विवेकशील साझा पार्टीको सामाजिक सञ्जाल तथा अन्य प्रकाशनहरुको सम्पादकमा पूर्व पत्रकार तथा हाल पार्टीका एकजना नेता शरदराज पाठकलाई नियुक्त गरेको छ।

उनले सञ्चार विभागको सम्पादकीय नेतृत्व सम्हाल्ने छन्।

पाठकले विवेकशील साझा पार्टीमा सकृय हुनअघि विभिन्न सञ्चारमाध्यममा सम्पादकीय नेतृत्व गरिसकेका छन्।

उनले अष्ट्रेलियामा रहँदा अष्ट्रेलियाको नेपालीपत्र साप्ताहिकका संस्थापक सम्पादक भएर काम गरेका थिए।

त्यसअघि उनी नेपालमा कालिका एफएम तथा रेडियो अन्नपूर्ण नेपालको समाचार प्रमूख र कान्तिपुर एफएमको सम्पादकीय टोलीका सदस्य थिए। उनले ग्रामिण विकासमा स्नातकोत्तर गरेका छन्।

विवेकशील साझा पार्टीमा शुरूदेखि नै सकृय भएका पाठक गत आम निर्वाचनमा पार्टीको तर्फबाट चितवन क्षेत्र नं ३ का उमेदवार थिए।

सञ्चार विभाग
विवेकशील साझा पार्टी
मिति: ०२ फागुन २०७५

अन्तर्राष्ट्रिय सद्भाव समूहका संयोजकमा डा राजेन्द्र पंगेनी

विवेकशील साझा पार्टीले “अन्तर्राष्ट्रिय सद्भाव समूह समन्वय समिति”को संयोजकमा अमेरिकामा क्यान्सर रोगबारे विद्यावारीधि पश्चातको अनुषन्धान गरिरहनुभएका डा राजेन्द्र पंगेनीलाई नियुक्त गरेको छ।

विदेशमा रहेका नेपालीहरूलाई विवेकशील साझा पार्टीमार्फत नेपालको रूपान्तरणमा प्रभावकारी ढङ्गबाट सहभागी गराउन, सन्सारका विभिन्न देशमा रहेका सद्भाव समूहहरूबीच सम्मनवय गर्न र त्यस्ता समूहहरूको सञ्जाल विस्तार गर्न पार्टीले “अन्तर्राष्ट्रिय सद्भाव समूह समन्वय समिति” गठन गर्ने निर्णय गरेको थियो।

स्याङ्जा वालिङ्गका स्थायी वासिन्दा चालिस वर्षीय डा पंगेनीले बेलायतको वोल्भरह्याम्प्टन बिश्वबिद्धालयबाट स्नातकोत्तर तथा बिद्धावारीधि गर्नुभएको हो।सो विश्वविद्यालयमा पढ्दा उहाँ सन्सारभरीबाट आएका विद्यार्थीहरूको एकजना निर्वाचित प्रतिनिध पनि हुनुहुन्थ्यो। उहाँ अमेरिकाको गैरआवासीय नेपाली संगठनको बिज्ञान प्रबिधि, इनोभेशन र नलेज ट्रान्सफर समितिका सहअध्यक्ष तथा नेपाल फर्कौं महाअभियानको एकजना प्रमुख अभियानकर्ता पनि हुनुहुन्छ।

डा पंगेनी विवेकशील साझा सद्भाव समूह, सिकागोका पूर्व संयोजक र हाल विवेकशील साझा सद्भाव समूह, लस एन्जेलसका संयोजक हुनुहुन्छ। विवेकशील साझा पार्टीका लागि कोष संकलन अभियानमा पनि उहाँको महत्वपूर्ण भूमिका रहँदै आएको छ।

डा पंगेनीलाई सम्पर्क गर्न फोन नं ‌+१ ८७२९८५१९१९ मा अथवा rajendrappangeni@gmail.com मा इमेल गर्न सक्नुहुनेछ।

मुमाराम खनाल प्रमुख,
संगठन विभाग
विवेकशील साझा पार्टी
मिति: ०१ फागुन २०७५